వేసవి పగబట్టింది!

ఆకాశంలో సూర్యుడు ఉగ్రరూపందాల్చినట్టు,

అగ్నిదేవుడు ఆగ్రహంతో రగిలిపోతున్నట్టు,

నిప్పుల కొలిమిలో అభ్యంగస్నానం చేస్తున్నట్టు,

నీడలు సైతం కొవ్వొత్తిలా కరిగిపోతున్నట్టు,

ఒకటే వేడి...!

నీరెండ కూడా నోరుతెరిచి చూస్తుంది

పట్టు చిక్కితే వడదెబ్బ కొట్టి మట్టుపెట్టాలని,

కిరణాల కోరలతో మరణాల పలహారాన్ని ఆరగించేయాలని.

ఈ వేసవి ఎందుకంతగా పగబట్టింది?

ఆకలిమంటతోనా?

కాదు...కాదు కడుపు మంటతో!

ప్రకృతి గర్భంలో పురుడుపోసుకున్న మానవుడు

కాలుష్య జ్వాలలతో కన్నతల్లి కడుపును కాల్చేస్తుంటే

ఆ కన్నపేగు మాత్రం ఎంతవరకు భరిస్తుంది?

అందుకే వేదనను వేడిగాలుల రూపంలో ప్రపంచం పైకి వదిలి

సాంత్వన పొందే ప్రయత్నం చేస్తుంది.