వాన చినుకులు

నల్లని మేఘం గొల్లుమని నవ్వినపుడు...

నింగి రహదారి మీద రెక్కలు లేని పక్షులై

పచ్చని ఆకుల మీద పసిరి అక్షరాలై

కొమ్మ, రెమ్మల మీద కొంటె కోణంగిలై

పూల చెంపలమీద అదరాల ముద్రలై

చిత్తడినేల మీద చిటపటల సరిగమలై

చెరువు నీటి మీద చుక్కల ముగ్గులై

తామరాకుల మీద తప్పెటలాటలై

ముత్యపుచిప్పల కౌగిలిలో పుత్తడిబొమ్మలై

ముత్యాల చినుకులు నేలకు విచ్చేసాయి..

జడివాన ఉయ్యాలలో మనసును లాలించాయి!

లంకెబిందువులు

కొమ్మ మాటిమాటికి ఊగుతుంది..

తన పిందెల బరువు చూసుకుని మురిసిపోతూ!

                    ***

చలిచీకటి మంచు దుప్పటి కప్పుకుంది..

తెల్లని ముసుగులో నిద్రపోవాలని కోరుకుంటూ ! 

                    ***

గులాబీ ఒళ్ళు విరిచి విచ్చుకుంది..

తన ముల్లు తనకు గుచ్చుకోకుండా జాగ్రత్తపడుతూ!

                         ***

అలలు ఒడ్డుకు చేరుతున్నాయి..

కొలనులో చేపల చక్కిలిగింతలకు పారిపోతూ!

మన కాలమానం