మనం తీసుకుంటున్న గోతిలో మనం

     ఎండలు మండిపోతున్నాయి, వడదెబ్బలకు జనం పిట్టల్లా రాలిపోతున్నారని గుండెలు బాదుకుంటున్నాం కాని ఇది పూర్తిగా మన స్వయంకృతం. మనం తీసుకుంటున్న గోతిలో మనమే పడుతున్నాం.  ప్రత్యక్షంగానో లేక పరోక్షంగానో  పచ్చని ప్రకృతిని ఎవరి పరిదిలో వారు చెరబడుతుంటే పాపం అది మాత్రం ఏంచేస్తుంది. పుడమితల్లిని కాపాడుకోవడంలో జనం చూపిస్తున్న అలవిమాలిన నిర్లక్ష్యం మున్ముందు మరింత ఉదృతమై మానవాళిని వివిధ రూపాల్లో ముంచెత్తబోతుందని చెప్పడానికి ఇవన్నీ నిదర్శనాలు.

     ప్లాస్టిక్ వినియోగాన్ని తగ్గించడని  ఎంతమొత్తుకున్నా బజారుకు వెళ్ళినప్పుడు కవర్ కొనడానికి మొగ్గుచూపుతాము తప్ప ప్రత్యామ్నాయాన్ని ఎంతమాత్రం ప్రోత్సాహించం. కురుస్తున్న వర్షం వృధాకాకుండా ఒడిసిపట్టండి అని పర్యావరణవేత్తలు తలబాదుకున్నా మన తలకెక్కదు సరికదా... మన ఇంట్లో ఇంకుడుగుంట తవ్వేంత ఉడత సాయం కూడా మనం చెయ్యలేము. కొత్తగా ఇల్లు కడుతుంటే జానెడు నేలను మిగిల్చి రెండు చెట్లు నాటి పచ్చదనానికి మనవంతు ప్రాణంపోయాలనే బుద్ది మనలో ఎంతమందికి ఉంటుంది. ఇంధనాన్ని ఆదాచేసి భూతాపాన్ని తగ్గించాలనే కనీస బాధ్యత కూడా మనకు గుర్తుకురాదు. ఒక పేపర్ ని వేస్ట్ చెయ్యడం లాంటి చిన్న చిన్న పనులద్వారా కూడా మనం ప్రకృతిని తీరని అనర్ధం చేస్తున్నాం.  చెప్పుకుంటూపోతే ఇలాంటివి కోకొల్లలు. పక్కింటివాడి ఇల్లు తగలడుతుంటే మనకెందుకులే అని ఊరుకుంటే తర్వాత తగలబడేది మన ఇల్లే. ఎండ తీవ్రతకు తాళలేక ఎవరో చనిపోయారని నేడు లెక్కలేసుకుంటున్నమనమే..రేపటి చావుచిట్టాలో ఉండమని గ్యారంటీలేదు. నిజంగా ఇది ప్రకృతి మనకు చేస్తున్న ఒక ముందస్తు హెచ్చరిక. ఇప్పటికైనా కళ్ళుతెరవకపోతే మున్ముందు మిగిలేది బూడిదే.

జెఠ్మలాని చెత్తవాగుడు

“అకారణంగా సీతను అడవికి పంపిన రాముడిని నేను ఆరాధించను..” – జెఠ్మలాని! 

"నీలాంటి వాళ్ళు ఆరాధించకపోతే  ఏంటట నష్టం?"

       జెఠ్మలానిలాంటి వాళ్ళు తమ స్వార్ధంకోసం చేసే రాద్ధాంతాల వలన  ధర్మానికి  అధర్మం అనే ఎంగిలి అంటుకోదు. ధర్మదేవత కోటు వేసుకుని నోట్లకోసం అవినీతి అధినేతల తరపున వకాల్తా పుచ్చుకుని వాదించే ఇలాంటి వారికి నిజమైన ‘ధర్మకోణం’ ఎప్పటికీ రుచించదు, అసలు కనిపించదు కూడా.

     అసలు ఈయన్ని రాముని గురించి నమ్మమని, ఆరాధించమని ఇప్పుడు ఎవరు బలవంతం చేసారు. ఈయనకి ప్రపంచంలో ఉన్న అధ్యాత్మిక పురుషులందరు పైన నమ్మకం ఉండి ఒక్క రాముని పైనే నమ్మకంలేదా?  అలా అయితే ఆయన అభిప్రాయాన్ని ఆయన వద్దే ఉంచుకోవాలి.ఇలా మరొకరి మనోభావాలపై బురదచల్లి తన దురద తీర్చుకోవడం ఎందుకు. ఈ విశాల భారతావనిలో  ఎవరికివారు తమకు నచ్చిన ధర్మాన్ని ఆరాధిస్తూ సామాజిక జీవనం సాగిస్తున్నారు. అంతమాత్రాన ఎవరికి వారు ఇలా నోరుపారేసుకుంటే ఎలా ఉంటుందో ఈ మేధావికి తెలియని విషయం అనుకోవాల? ఇలాంటి వ్యాఖ్యలే మరెవరిమీదైనా  చేసుంటే ఈపాటికి ఈయన  పరిస్తితి ఎలా ఉండేదో జెఠ్మలానికి బాగా తెలుసు. అందుకే అటువైపు కన్నెత్తి చూడటానికి కూడా ఇలాంటి వాళ్ళు భయపడతారు. 

      పురవీధిలో దేవుని పల్లకి బయల్దేరుతుంటే మంగళవాయిద్యాలు ఒక్కసారిగా మోగుతాయి. అదివిన్న జనానికి భక్తిభావం ఉప్పొంగుతుంది. అదే సమయంలో ఆ వీధిలో ఉండే కుక్కలు ఉలిక్కిపడి మొరగడం ప్రారంభిస్తాయి. అంతమాత్రాన వాటి పరపతి పెరగదు, స్వామివారి పరపతి తగ్గదు. 

హీరో సూర్య సందేశం

హీరో సూర్య పేరు మీద  ఇటీవల ముఖసంకలనం (Face Book) లో కనిపించిన సందేశం ఇది. ఎవరికైనా ఉపయోగపడొచ్చు. నచ్చితే నలుగురుతో పంచుకోండి.

ఆవిడ ఏం చెబుతుంది..ఈవిడ ఏం వింటుంది?

 మొన్నామధ్య అదేదో పోలీస్ స్టేషన్ లో నా మీద ఎవరో కంప్లైంట్ ఇవ్వడానికి జనాన్ని పోగేసుకుని వెళ్ళారంట. కారణమేమిటా అని వాకబు చేస్తే 'ఊసులతీరం' లో నేను సరిగ్గా టపాలు రాయడంలేదని, బ్లాగురాజు కల్లోకి వచ్చి హెచ్చరించినప్పటికి నేను నా పద్దతి మార్చుకోలేదనేది ప్రధాన అభియోగం.

పరిస్థితి ఇంత తీవ్రస్థాయికి వెళ్లడానికి నేనే కారణం. చెన్నై మెరీనా బీచ్ లో ఒక విచిత్రం జరగబోతుందని నాకు ఉప్పందింది. దానిని నా కెమేరాలో బంధించాలని హైదరాబాద్ లో మాయమై చెన్నై మెరీనా బీచ్ లో ప్రత్యక్షమయ్యాను. అనుకున్నది సాధించాను. అందుకోసమే ఇటీవల నా 'ఊసులతీరం' బోసిపోయింది, బ్లాగరులకు కోపమొచ్చింది, మేటర్ సీరియస్ అయ్యింది, కేస్ స్టేషన్ వరకు వెళ్ళింది.
ఇంతకీ మెరీనా బీచ్ లో నేను కెమెరాలో బంధించిన ఆ అద్భుతం ఏమిటనుకుంటున్నారా?
 "ప్రాణం లేని విగ్రహం, ప్రాణం ఉన్న కాకి తెగ మాట్లాడేసుకుంటున్నాయ్". నమ్మకం లేదా? అయితే కింద వున్న ఫోటోలు చూడండి..

 

ఆవిడ ఏం చెబుతుంది..ఈవిడ ఏం వింటుంది?

ఆదివారం శుభాకాంక్షలు

తెల్లారగట్ల మాంచి నిద్దట్లో ఉండగా ఎవరో నన్ను పిలుస్తున్నట్టుగా అనిపించి కల్లోనే కళ్ళు తెరిచి చూసాను. చుట్టూ బోలెడంత వెలుగుతో తల స్థానంలో ఎల్.సి.డి మానిటర్ తో చేతిలో కీబోర్డ్, మౌస్, పెన్ డ్రైవ్, హార్డ్ డిస్క్ లాంటి పరికరాలతో ఓ విచిత్రమైన వ్యక్తి కనిపించాడు.
ఆకారం, రూపం చాలా కొత్తగా ఉంది.ఇంతకుముందెప్పుడు ప్రత్యక్షంగా అలాంటి వ్యక్తిని చూసిన దాఖలాలు లేవు.ఆలోచించడం అనవసరం అనిపించి...
"ఎవరండీ మీరు?" అని ఆయన్నే అడిగేసాను.
"నన్ను గుర్తుపట్టలేదా?"
"లేదండి..ఎవరండి మీరు?"
"నేను..బ్లాగురాజు ని"
"బ్లాగురాజా? నేనింతకు ముందెప్పుడు మిమ్మల్ని చూడలేదండి. కొంచం వివరంగా చెప్పండి బుర్ర హీటెక్కిపోతుంది"
"అదేంటి బాలు. ఊసులతీరం అనే ఒక బ్లాగు ని నాలో ఓపెన్ చేసావ్ నన్ను గుర్తించకపోవడమేంటి"
"ఓ మీరా! అయ్యబాబోయ్ సారీయండి. గుర్తుపట్లేపోయాను"
"పర్వాలేదు"
"అది సరేగాని బ్లాగురాజు గారు మీరేంటి ఇలా ఒచ్చేసారు?" అవసరం ఆయనదేమోననుకుని అడిగేసాను.
"ఏముంది నాయనా. ఊసులతీరం అనే బ్లాగ్ ఓపెన్ చేసావ్. మొదట్లో బాగానే టపాలు రాసావ్. ఈ మద్య మరీ టపాలు రాయడం తగ్గించేసావ్. ఇలాగైతే ఎలా చెప్పు"
"అది ఈ మద్య కొంచెం పని ఎక్కువై టైమ్ కుదరట్లేదండి"
"మాకు మాత్రం కుదురుతుందా చెప్పు. ఉన్నంతలో టైమ్ అడ్జస్ట్ చేసుకుంటూ నీలాంటి వాళ్ళందరికి బ్లాగ్ విషయం గుర్తుచెయ్యట్లేదా"
"కరెక్టేనండి.కానీ..."
"కానీ లేదు కరెన్సీ లేదు. నువ్విలా క్రమశిక్షణ, సమయపాలన లేకుండా బ్లాగునలా వదిలేస్తే..ఆ ఊసులతీరంలో ఊసులు లేక, సందర్శకుల తాకిడి లేక  బోసిపోవట్లేదు?"
"అవునండి"
"నీ బ్లాగులో మొదటి కామెంట్ పెట్టిన రసజ్ఞగారు, నిన్ను తమ కామెంట్లతో ఎప్పటికప్పుడు ఎంకరేజ్ చేస్తున్న జ్యోతిర్మయి, రాజి, జిలేబి, మధురవాణి, సాదారణ పౌరుడు, సుభ, శిశిర, కస్టేఫలి, కొత్తపాళీ,raf raafsun, మీను, వెన్నెల... వీరందరూ నీ గురించి ఏమనుకుంటారు చెప్పు?"
"కరెక్టేనండే.."
"ఏమిటి కరెక్టు..ఇప్పటికైనా కళ్ళు తెరిచి విధిగా టపాలు రాయడం ప్రారంభించు"
"అలాగే బ్లాగురాజుగారు! రేపట్నించి క్రమం తప్పకుండా రాసేత్తానండి"
"రేపటిదాకా ఏమిటి వర్జ్యం. ఇప్పుడే ప్రారంభించు"
"అంటే.. ఇప్పటికిప్పుడు రాసెయ్యమంటే ఏం రాయాలో బుర్రకెక్కట్లేదు. పోని ఏం రాయాలో మీరే చెప్పండి"
"ఏదొకటి రాయ్"
"అదే ఏంటా అని అడుగుతున్నానండి"
"నీకు తోచింది రాసెయ్. ఆఖరికి ఏమీ తోచకపోతే 'ఆదివారం శుభాకాంక్షలు' అని టపా పెట్టు"
"ఆదివారం శుభాకాంక్షలా"
"ఏం.. ఆదివారం శుభాకాంక్షలు చెప్పుకోకూడదా? అదిరోజు కాదా? మీలాంటివాళ్ళు రెస్ట్ తీస్కోవడానికి ఆదివారం కావాలిగాని, శుభాకాంక్షలు చెప్పుకోవడానికి అది పనికిరాదటయ్యా?"
"అ..వస్తుందండి"
"మరింకే.. ఆదివారం శుభాకాంక్షలు అని ఓ టపా రాసిపారెయ్"
"అలాగే బ్లాగురాజా" అని నేను అనగానే బ్లాగురాజు మాయమైపోయాడు.
ఆయన కోరికమేరకు...
బ్లాగరులందరికీ...
"ఆదివారం శుభాకాంక్షలు"

జామకాయ తినాలంటే!

ముందుగా నాణ్యమైన జామ మొక్కను ఎంచుకోవాలి!

మొక్కకు ఎలాంటి లోటు రాకుండా పోషణ చేయాలి!

మొక్కకాస్తా బలంగా పెరిగి చెట్టులా మారుతుంది!

ఇలా పూతపూసి కాయలు కాయడానికి సిధ్దమౌతుంది!

ఒళ్ళంతా కాయలు చేసుకుని విరగకాస్తుంది!

కాయలు పక్వానికి వచ్చాయని చిలకమ్మ ఇలా కొరికి చెబుతుంది!

మనం ఆమ్..ఆమ్మని తినెయ్యాలీ...!

'కార్యేషు దాసుడు'

సికింద్రాబాద్ నుండి పాలకొల్లు వరకు  నర్సాపూర్   express  లో ప్రయాణం చేస్తున్నాను. నాకు మొదట్నించి రిజర్వేషన్ బోగీలో ప్రయాణం చేయడంకంటే జనరల్ బోగీలోనే ప్రయాణం చేయడం ఇష్టం. కొన్నికొన్ని అసౌకర్యాల గురించి మర్చిపోతే అక్కడ వుండే ప్రయాణీకుల్లో రకరకాల మనుషులను, మనస్తత్వాలను, అభిప్రాయాలను దగ్గర నుండి పరిశీలించే అవకాశం వుంటుంది.ఐపాడ్స్, headphones  వచ్చిన తర్వాత రిజర్వేషన్ బోగీలలో ప్రయాణించే ప్రయాణీకుల మధ్య దూరాలు బాగా పెరిగిపోయాయి. పక్క పక్క బెర్త్ లోనే వున్నప్పటికి ఎవరి ప్రపంచం వారిది. లగేజ్ సర్దగానే హెడ్ ఫోన్స్ పెట్టుకుని ట్రైన్ తో పాటుగా పాటలలోకం లో వూగిపోతుంటారు.ఇవన్నీ అదోరకమైన ఒంటరి ప్రయాణాలు...!

జనరల్ బోగీ కావడంతో కొంచెం రద్దీగానే వుంది. కూరగాయల ధరల నుండి కుంభకోణాల వరకు అసలైన ప్రజానీకం సిసలైన కామెంట్స్ చేస్తున్నారు. వీటన్నిటినీ సావధానంగా పరికిస్తున్న నా కళ్ళు కిటికీ దగ్గర వున్న సింగిల్ సీటర్ పై  ఆగిపోయాయి. అక్కడొక అరుదైన దృశ్యం.

ఇద్దరు భార్యాభర్తలు.. చూస్తుంటే ఆమె అనారోగ్యంతో వున్నట్టుగా వుంది. ఆమె ముఖం చూస్తుంటే ఆ విషయం స్పష్టమవుతుంది.మామూలుగా అయితే ఆ సింగిల్ సీట్ లో  తెలియని వారు సైతం  ఇద్దరు సర్దుకుని కూర్చుంటారు .కానీ ఆ సీట్ లో ఆమె ఒక్కదాన్నే కూర్చోబెట్టి, రెండు సీట్ లకు మధ్య లో వుండే ఖాళీ లో  కింద కూర్చున్నాడు ఆ భర్త. నిజానికి ఆ ఖాళీ జాగా కూడా చాలా డిమాండ్ అక్కడ. జనరల్ బోగీలో ప్రయానించే ఎవరికైనా ఈ విషయం అనుభవమే.ఆమె బాగా నీరసంగా కనిపిస్తుంది. అతని కళ్ళలో కూడా కొంచెం ఆందోళన  కనిపిస్తుంది. ఎప్పుడు ఏం అడుగుతుందో అన్నట్టుగా ఆమె కదిలిన ప్రతిసారి ఆ భర్త ఆమెను ఆరాతీస్తున్నాడు 'ఏం కావాలన్నట్టుగా' .

రైలు వేగం అందుకుంది. వేడి వేడి వాదనలు చల్లారిపోయాయి. చాలా మంది నిద్రలోకి జారుకున్నారు. 'నిద్ర సుఖమెరగదు' అన్న విషయం ఇక్కడ సరిగ్గా సరిపోతుంది. ఉన్నంతలో ఎవరికి వారు నిద్రాదేవత ఒడిలో సర్దుకుపోయారు. నాకు సీట్ దొరకలేదు. నేను కూడా కొంత జాగా దొరికితే కిందే చతికిలబడ్డాను. కొంతసేపటికి ఎవరో toilet  తలుపు వేసినట్టు లేదు. దుర్వాసన ఎక్కువగా వస్తుండటంతో లేచి వెళ్ళి తలుపు వేసి ఆ పక్కనే వున్న డోర్ నుండి బయట ప్రపంచాన్ని చూస్తుండిపోయాను.చీకట్లో అన్నీ అస్పష్టంగా కదులుతున్న ఛాయాచిత్రాలే.కొంతసేపటికి 'ఇక చాలు' అనిపించి మళ్ళీ నేను ఇందాక చతికిలబడ్డ చోటుకి వచ్చాను.

అప్రయత్నంగా ఇందాకటి దృశ్యం గుర్తుకొచ్చి ఆ భార్యాభర్తలు  కూర్చున్న వైపు చూసాను. ఈసారి ఇంకా మనోహరమైన దృశ్యం. ఆమె మగతగా నిద్రపోతుంది. కింద కూర్చున్న భర్త ఆమె పాదాలను తన ఒడిలో పెట్టుకుని వాటిని ఒత్తుతు ఆమెకు  సపర్యలు చేస్తున్నాడు నిద్రపోకుండా. భార్య మాట వింటేనే తన పురుషహంకారం ఎక్కడ తగలడిపోతుందో అనుకునే భర్తేశ్వరులు ఇంకా వున్న ఈ లోకంలో, ఆయన చుట్టూ ఎంత మంది వున్నాపట్టించుకోకుండా ఆమె పాదాలు పట్టుకుని సపర్యలు చేస్తున్నాడు.వెంటనే నాకు ఒకసారి ఆఫీస్ లో కొలీగ్స్ మధ్య  చర్చకు వచ్చిన ఒక విషయం గుర్తుకొచ్చింది..

ఇంతకుముందు టీవిలో ఒక యాడ్ వచ్చేది. కార్ చెడిపోవడంతో ఇంటికి నడిచి వచ్చిన తన భార్య పాదాలను ఒడిలో పెట్టుకుని ఆమె అలసట పోగొడుతూ తన ప్రేమను తెలియజేస్తాడు భర్త. కమర్షియల్ గా ఈ వ్యాపార ప్రకటన కంపెనీకి ఎంత లాభం చేకూర్చిందో తెలియదుకాని. నిజానికి ఇది చాలా  అందమైన ఆలోచన.ఈ యాడ్ వచ్చినప్పుడల్లా మా కొలీగ్ వాళ్ళ అత్తగారు 'మరీ చోద్యం కాకపోతే ఇవేం ముదనష్టపు ఆలోచనలే తల్లీ. ఆ మొగుడనేవాడు కాళ్ళు పట్టుకున్నాడే అనుకో ఆ మహాతల్లి రెండు కాళ్ళు ఇచ్చెయ్యడమే. ఒద్దండీ అని వెనక్కి తీస్కోవడం తెలీదు' అని నోరునొక్కుకునేదట. ఈ విషయం మా కొలీగ్ ఆ యాడ్ వచ్చినన్నాళ్ళు ఏదో ఒక సందర్భంలో చెప్తుండేది.

 

ఇప్పుడు రైలు లో అలాంటి భర్త ప్రత్యక్షంగా తారసపడటం నిజంగా ఒక మంచి అనుభవంగా అనిపించింది నాకు. ఇలా భార్యలకు సపర్యలు చేసే భర్తలు ఇంకెవరూ లేరా అంటే.. ఖచ్చితంగా వుండే వుంటారు.. కానీ వారికి గుర్తింపేది. "కార్యేషు దాసీ..కరణేషు మంత్రీ.." అని అన్నీ స్థానాలు ఆడవారికే ఇచ్చేసారు మన పెద్దలు. కాబట్టి ఇలాంటి వారికోసం ఒక చిన్న మార్పుతో.." కార్యేషు దాసుడు.." అని అనుకుందాము...స్త్రీమూర్తులకు అభ్యంతరం లేకపోతే!

ఐశ్వర్య కూతురు పేరు-పార్ట్2

ఐశ్వర్యరాయ్ కూతురుకి పేరు పెట్టాలన్న అభిషేక్ బచ్చన్ ట్విట్  కి నా మెదడు స్పందించి చివరకు "ఎల్వ, ఎల్లెల్వ" అనే రెండు పేర్లు ఫైనల్ చేసాను. ఆ పేర్లకు తదుపరి   టపాలో వివరణ ఇస్తానని ప్రియమైన బ్లాగరులకు మాటిచ్చాను. కానీ పని ఒత్తిడి వలన ఆలస్యమైపోయింది.మన్నించండి. ఇన్ని రోజులు "ఎల్వ, ఎల్లెల్వ" పేర్లకు వివరణ ఇవ్వలేకపోతున్నానె అనేది ఒక టెన్షన్ అయితే, నేను పేర్లు ఫైనల్ చేసేలోపు 'బేటీ బచ్చన్' కి బచ్చన్ కుటుంబం ఎక్కడ పేరు పెట్టేస్తుందోనని మరో  టెన్షన్... ఏదైతేలెండి "ఎల్వ, ఎల్లెల్వ" పేర్లు అంకురించడం వెనక గల సంఘటనలను మీ ముందుకు తీసుకు వొస్తున్నాను.

"ఎ" అనే అక్షరంతో పాపాయి పేరు ప్రారంభమవ్వాలనేది అభిషేక్ ఇచ్చిన ఒకే ఒక్క కండిషన్. అందుకోసం ముందుగా "ఎ" అనే ఆరంభం కలిగిన పదాలను, పేర్లను గుర్తుకుతెచ్చుకున్నాను...కొంచెం 'క్లూ' గా ఉపయోగపడతాయని.

'అసలు "ఎ" అనే అక్షరాన్నే పేరుగా పెడితే ఎలా వుంటుంది' అని ఒక ఆలోచన వచ్చింది. 'ఛఛ..బాగోదు. ఎందుకంటే "ఎ" అని అనగానే మనవారికి  వెంటనే "అడల్ట్స్ ఓన్లీ" అని అర్ధం వచ్చే "ఎ"  సినిమా సర్టిఫికెట్ తప్ప వేరే యేదీ గుర్తుకురాదు.కాబట్టి "ఎ" అనే అక్షరానికి ఎంత మంచి అర్ధం వున్నప్పటికి ఇక్కడ పనికిరాదు.

'ఎంకమ్మ' అని పెడితే..? బాగానే వుంటుంది..కానీ అది మన రాష్ట్రంలో వుండే ఒక  గ్రామదేవత పేరు అని తెలియని బాలీవుడ్ సినీజనం "ఇది తెలుగు సినిమాలోని పాపులర్ కామెడీ తిట్టు" అని బచ్చన్ కుటుంబానికి ఉప్పందిస్తే? నేను వాళ్ళను మోసం చేసానని అనుకుంటారు. కాబట్టి ఇది కాన్సిల్.

"ఎంకి" అని పేరు పెడితే...ఆహా! సత్తు కారేజ్ లో చద్దన్నం లా చాలా బాగుంది. పైగా 'ఎంకి' పేరుతో మన నండూరివారి అద్భుత సృష్ఠి వుండనే వుంది. ఇంతకంటే మంచి పేరు ఎక్కడ దొరుకుతుంది. ఇదే ఫైనల్ అనుకున్న వెంటనే మళ్ళీ మనసులో మరో భయం..."పంటకాల్వలు, పిల్లగాలులు, వెండి మబ్బులు, పైరు పడుచులు తెలియని వారికి 'ఎంకి' అని పేరు పెట్టి అవమానిస్తావా నీ ఎంకమ్మ" అని నండూరివారికి కోపం వచ్చి నన్ను తిడితే..అమ్మో బాగుండదు..కాన్సిల్.

ఇలా అనుకున్న ప్రతిదానికి ఏదో ఒక సమస్య..
ఎవరెస్ట్ అని పెడితే...? -  "మరో ఐశ్వర్యరాయ్ కావల్సిన అమ్మాయికి పెట్టాల్సిన పేరు నాజూగ్గా వుండాలిగాని పర్వతాలు, గుట్టల పేర్లేమిటి" మనసు ఘోష!

ఎరుపు..ఎకరం..ఎటకారం..ఎవరు..ఎకాడ.. ఇలా ఎన్నో.. ఎన్నో ఆలోచనలు..కానీ ఫలితం శూన్యం. "ఎవరు, ఎకాడ.." కూడా పేర్లేనా అని అడగొద్దు. ఇప్పటి పేర్లకు చాలా మట్టుకు అర్ధం వుండట్లేదుకదా అనేదే నా ధైర్యం.

చివరకు నా ప్రయత్నాన్ని విరమించుకోవాలనే నిర్ణయానికి వచ్చి చివరి ప్రయత్నంగా 'నరసాపురం దగ్గర లచ్చేశ్వరంలో' వుంటున్న నా క్లాస్మేట్ వెంకీ కి ఫోన్ చేసి విషయం చెప్పి సలహా అడిగాను.

"ఏంట్రా! ఎకసెక్కాలా.. ఆ వార్త వచ్చినకాడ్నించి నేను అదే పనిలో వున్నాను. ఎండుచేపలు,ఎండుకొబ్బరికాయలు, ఎలితుమ్మచెట్లు, ఎలక్కాయలు తప్ప నాకు కొత్త పేర్లేమి బుర్రలోకి రావట్లేదు. బుల్లి ఐశ్వర్యకు పేరు పెట్టి క్రెడిట్ కొట్టేయాలని నాకు మాత్రం లేదేంటి.అలాంటి ఐడియా వత్తే ఆ పేరేదో నేనే పెట్టేత్తానుగాని నీకు చెప్తానేంటి..ఎల్లెల్వా" అని ఫోన్ పెట్టేసాడు.

వాడు కోప్పడితే కోప్పడ్డాడు గాని చివర్లో వాడన్న పదం పై నా దృష్టి పడింది. "ఎల్లెల్వా".. ఇది కూడా "ఎ" అనే అక్షరంతోనే ప్రారంభమయ్యింది. దీన్నే కొత్తగా చెబితే.. ఇందులో మొదటి, చివరి అక్షరాలను కలిపితే "ఎల్వ".. ఇంకొంచెం మార్పు చేస్తే.."ఎలెల్వా".హమ్మయ్యా నేను డిసైడ్ ఐపోయాను..ఈ రెండు సెమీఫైనల్..వీటిలో ఒకటి ఫైనల్. ఇక మిగిలింది..."ఎల్వ..ఎలెల్వ" లో ఫైనల్ విజేత ఎవరు? ఇప్పటి పేర్లు పెద్దగా వుంటే పిలిచేంత టైమ్, ఓపిక రెండు జనాలకి వుండట్లేదు కాబట్టి..ఆ రకంగా  నా ఓటు "ఎల్వ" కి వేసాను. అయినా కాని ఎక్కువ శాతం ఓట్లు ఏ పేరుకు పడితే అదే ఫైనల్ పేరు అవుతుంది.

ఈ టపా చదివినవారిలో బచ్చన్ కుటుంబ అభిమానులు, దగ్గరివారు ఎవరైనా వుంటే ఒక వినతి.. మీకు ఈ టపా నచ్చితే నాగురించి వారికి చెప్పండి. నచ్చకపోతే వారి దృష్ఠికి తీసుకెళ్ళకండి.
(సెలబ్రిటీస్ ఇంట్లో ఏంజరిగినా వార్తే అన్నదానికి ఇది సరదా ప్రయత్నం మాత్రమే.. సరదాగా తీస్కోండి)

ఐశ్వర్య కూతురు పేరు-పార్ట్1

'మా ముద్దుల పాపాయికి మంచి పేరు సూచించండి' అంటూ అభిషేక్ బచ్చన్ కోరారు. 'ఎ' అనే అక్షరంతో మొదలయ్యే పేరు కావాలట.అందుకోసం ఒలింపిక్స్ రేంజ్ లో కసరత్తు చేస్తే చివరకు రెండు పేర్లు 'ఐశ్వర్య కూతురుకి సరిపోతానంటే  నేనని'  పోటీపడుతున్నాయి. 

"ఎల్వ, ఎల్లెల్వ"... ఎలా వున్నాయండి పేర్లు. వెరైటీగా ఫీలయ్యారా?

మీరు సింపుల్ గా 'బాగుంది...బాగోలేదు' అనేస్తే నేను వాటికోసం పడ్డ కష్టానికి గుర్తింపేముంటుంది. అందుకే ఈ 'ఎల్వ, ఎల్లెల్వ' అనే పేర్లు ఎలా పుట్టాయో వివరిస్తాను.

మునుపటి రోజుల్లో పిల్లలకు పెట్టె పేర్లకు ఒక అర్ధమంటూ తప్పనిసరిగా వుండేది. 'పెంటయ్య' అనే పేరు పలకటానికి మనకే ఇబ్బందిగా వున్నా దాని వెనకాల కూడా ఒక పరమార్దం వుండేదట. క్లుప్తంగా వివరిస్తాను.

ఒక తల్లి పుట్టబోయె బిడ్డ మీద ఎన్నో ఆశలు పెట్టుకుంటుంటే పుట్టిన బిడ్డలు పుట్టినట్టు పురిట్లోనే చనిపోతున్నారట. ఆఖరికి మళ్ళీ బిడ్డ పుట్టబోయే సమయం ఆసన్నమైనప్పుడు ఆ బిడ్డ పై మునుపటిలా అతిగా ఆశలు పెట్టుకోకుండా 'ఈ బిడ్డ కూడా పుట్టలేదనుకుని పుట్టగానే తీస్కెళ్ళి పెంటమీద (చెత్తతో పేరుకుపోయిన గుట్ట)  పడెయ్యమన్నారట పెద్దలు'.అందరిలాగే వీడు బతకలేదనుకుందాం అని ఆ తల్లిదండ్రులు అలాగే చేసారట. విచిత్రంగా ఆ బిడ్డడు బతికాడు. అందరిలో ఒకటే ఆనందం.ఇన్ని దేవుళ్లకు మొక్కినా దక్కని బిడ్డ ఇప్పుడు దక్కడానికి ఆ పెంటే కారణం అనుకుని అతనికి 'పెంటయ్య' అని పేరు పెట్టారట.

ఇక ఇప్పటి పిల్లల పేర్లలో అర్దాలు వెతుక్కోవడం కంటే పెద్ద తప్పు మరోటి వుండదు. మొన్న తెలిసిన వాళ్ళ ఇంట్లో పుట్టినరోజు కార్యక్రమానికి వెళ్ళాం. అక్కడకు ఒకామె ఐదు సంవత్సరాల తన కూతుర్ని తీసుకుని వచ్చింది. తల్లి వచ్చీరాని ఇంగ్లీష్ తప్ప తెలుగు మాట్లాడే ప్రయత్నం చెయ్యడం లేదు. కాని ఆమె ఈ.గో జిల్లా (తూ.గో.జిల్లా) వాస్తవ్యురాలని ఇంగ్లీష్ లోంచి తొంగి చూస్తున్న స్లాంగ్ ఇట్టే చెప్పేస్తుంది.భోజనాల సమయంలో 'పిస్సీ' బట్టలమీద పడకుండా తిను అని బట్లర్ ఇంగ్లీష్ లో  అంది.

అది విన్న నేను ముద్ద మింగడం మానేసి మెడ పైకెత్తి చూసాను. 'పిస్సీనా'.. అప్రయత్నంగా బయటకు అనేసాను."అవునండి.. పాప పేరు పిస్సీ".. అంది. నాకు ఆ పదం వినగానే వేరే యేదో వాడుకలో వున్న అర్ధం స్పురించింది. అంతెందుకు 'అలా మొదలైంది' సినిమాలో టాయ్-లెట్ దగ్గర హీరో హీరోయిన్ తో చెప్పిన పదం ఏదో గుర్తొచ్చింది. నా ఆలోచనలకు ముగింపుగా "అమ్మా! సాంబారు చాలా బాగుంది.పిసుక్కుని తింటుంటే ఇంకా బాగుంది" - అని ఆ చిన్నారి ఎలాంటి అరమరికలు లేకుండా వాళ్ళమ్మకు అరుస్తూ చెబుతుంది."పిస్సీ" అంటే అర్ధం ఏమిటండీ అని అడుగుదామనుకునే ఆ ప్రయత్నాన్ని విరమించుకున్నాను.తీరా అడిగాక "మీరు అలా మొదలైంది సినిమా చూడలేదా?" అని ఆ బంగారు తల్లి అడిగితే.

ఇందేంటిది ఎక్కడో ములిగి ఎక్కడో తేలాను. అసలు ఐశ్వర్య కూతురికి 'ఎల్వ, ఎల్లెల్వ' అనే పేర్లు పెట్టడం వెనకున్న అర్ధం, అసలు ఆ పేర్లు ఎలా పుట్టాయనేది చెప్పడం మానేసి ఎటో వెళ్ళిపోయాను.
బ్లాగరులు క్షమించండి.ఐశ్వర్య కూతురు పేరు సినిమాలా చెప్పాలనుకుంటే సీరియల్ అయ్యింది. సమయాభావం వలన 'ఎల్వ, ఎల్లెల్వ' పేరుకు వివరణ ఈ టపా లో ఇవ్వలేకపోతున్నాను. తదుపరి టపాలో సూటిగా విషయానికి వచ్చేస్తాను. ఈలోపు ఈ రెండింటిలో ఏ పేరు ఫైనల్ గా పెడితే బాగుంటుందో మీరు కూడా ఆలోచించండి.

"దూకుడు" రికార్డ్స్ ని మించిన రికార్డ్

బ్లాగు చరిత్రలో ఆల్ టైమ్ రికార్డ్. నాకు తెలిసి ఇప్పటి వరకు జరగనిది.. ఇక ముందు కూడా జరగని సెన్సేషనల్ రికార్డ్ ఇదే..ఇదే..ఇదే.. ఈ నా బ్లాగ్ రికార్డ్ ముందు మహేశ్ 'దూకుడు' రికార్డ్స్ ఏరకంగా చూసినా సరిపోవు. బ్లాగరుల్లో ఎవరికైనా 'గిన్నీస్ బుక్ ఆఫ్ రికార్డ్స్' వారితో పరిచయం వుంటే వెంటనే ఈ విషయం వారి చెవిలో వేసి నా బ్లాగ్ చరిత్రపుటల్లో వుండేలా మీ వంతు సాయం చేయండి.
అంతర్జాల వీక్షకులలో ఎవరికైనా మీడియా వారితో పరిచయం వుంటే వెంటనే 'పగిలిపోతున్న వార్త' రూపంలో టీవీ లలో వచ్చి ప్రపంచమంతా 'న్యూసై' కూసేలా చేయండి. ఇంకా ఇలా ఏఏ రూపాలలో ఈ సంచలన రికార్డ్ ని జనం ముందు వుంచాలో అన్ని రూపాలలో వుంచడానికి నా శ్రేయోభిలాషులందరు  తలో దిక్కుకు పరుగులు తీయండి.

'ఇంతకీ ఆ రికార్డ్ ఏంటంటారా..? అయ్యో ఇంతకీ నేను విషయం చెప్పకుండానే ఈ హడావిడి చేస్తున్నాన. క్షమించండి.. ఇంతకీ ఆ వార్త ఏంటంటే..'నిన్ననే ప్రారంభించిన నా బ్లాగు... పట్టుమని పది టపాలు కూడా లేని నాబ్లాగు...ఉదయానికి కేవలం 23 హిట్స్ తో వున్న నా బ్లాగు.. ఇప్పుడు చూసేటప్పటికి నాలుగు లక్షల హిట్స్ దాటి ఐదు లక్షల వైపు పరుగులు పెడుతుంది. ఇంతకంటే గొప్ప రికార్డ్, ఆల్ టైమ్ రికార్డ్, బ్లాగ్ ఆఫీస్ రికార్డ్ ఇంకేముంటుంది.ఋజువు కావాలంటే నాబ్లాగుకు ఎడమవైపున, పైభాగంలో వున్న హిట్ కౌంటర్ చూడండి.

"..ఈ దూకుడు..." అదిగో ఎవరో సందర్భానికి తగ్గ పాట ప్లే చేస్తున్నారు. "సాటెవ్వరు"...


గమనిక : ఇలాంటి వింత జరగడానికి కారణం ఏమయ్యుంటుందో తెలిస్తే చెప్పగలరు. కలికాలం అని మాత్రం తప్పించుకోకండి.